რუსეთის პრეზიდენტის, ვლადიმირ პუტინის თქმით, NATO-ში საქართველოსა და უკრაინის გაწევრება მისი ქვეყნის ნაციონალურ უსაფრთხოებას საფრთხეს უქმნის. ამის გამო, რუსეთს ჩრდილოატლანტიკურ ალიანსში ამ ორი ქვეყნის მიღებაზე უკიდურესად უარყოფითი რეაქცია ექნება. ამის შესახებ რუსეთის პრეზიდენტმა Fox News-თან ინტერვიუში ისაუბრა.

„ჩვენთვის ეს არის პირდაპირი და მყისიერი საფრთხე ჩვენი ნაციონალური უსაფრთხოებისთვის. ჩვენს საზღვრებთან NATO-ს ინფრასტრუქტურის მოახლოება არის საფრთხე და ამაზე რეაქცია უკიდურესად ნეგატიური იქნება“, - თქვა პუტინმა შეკითხვის საპასუხოდ, როგორი დამოკიდებულება ექნება რუსეთს უკრაინისა და საქართველოს NATO-ში გაწევრებაზე.

„მე კარგად ვიცი, როგორ იღებენ NATO-ში გადაწყვეტილებებს. რა თქმა უნდა, იქ ყველა გადაწყვეტილება კონსენსუსით მიიღება.

თუმცა ამის გარეშეც  NATO-ს ცალკე წევრებთან მიდის მუშაობა ორმხრივ საფუძველზე. ეს გაკეთდა პოლონეთთან, რუმინეთთან, სადაც ახლა მიმდინარეობს აშშ-ის სტრატეგიული რაკეტსაწინააღმდეგო თავდაცვის ელემენტების განთავსება“, - განაცხადა პუტინმა და დაამატა, რომ NATO-ს ინფრასტრუქტურისა და სამხედრო კონტინგენტის გაფართოებას აღმოსავლეთით რუსეთი ეროვნულ საფრთხედ აღიქვამს.