ტაილანდში, 12 მოზარდი და მათი მწვრთნელი მღვიმიდან გამოყვანის შემდეგ საჯაროდ პირველად გამოჩნდნენ. საფეხბურთო გუნდის წევრები ამ წუთებში პრესკონფერენციაზე მღვიმეში გატარებულ დღეებს იხსენებენ.
მოზარდები და მათი მწვრთნელი ამ დრომდე კლინიკაში რჩებოდნენ, სადაც მათ ჯანმრთელობის მდგომარეობას აკვირდებოდნენ. რამდენიმე დღის განმავლობაში მოზარდებს მშობლების ახლოდან ნახვაც არ შეეძლოთ. საფეხბურთო გუნდის წევრები საავადმყოფოდან დღეს გაწერეს.
Video by @CNN’s @patrick_bkk of the #WildBoar boys emerging from hospital in Chiang Rai #ThamLuang pic.twitter.com/ivS0AXeKQu
— Rebecca Wright (@bexwright1) July 18, 2018
ტაილანდში, თამ ლუანგის მღვიმეში 12-მა ბავშვმა და მათმა მწვრთნელმა 2 კვირაზე მეტი გაატარეს. ისინი მღვიმის დასათვალიერებლად 23 ივნისს შევიდნენ, მაგრამ ძლიერმა წვიმამ გამოსასვლელი ჩაკეტა და მოზარდები გამოქვაბულში ჩარჩნენ.
მოზარდების გამოყვანა მხოლოდ 17 დღის შემდეგ მოხერხდა. უშუალოდ გამოყვანის ოპერაცია სამ დღეს გაგრძელდა, რადგან მღვიმიდან მოზარდების დახსნა ბევრ სირთულესთან იყო დაკავშირებული.
ბავშვების ასაკი 11-დან 16 წლამდეა, მწვრთნელი კი 25 წლისაა. ისინი ბრიტანელმა მყვინთავებმა მღვიმეში, 4 კილომეტრის სიღრმეში 10-დღიანი ძებნის შემდეგ იპოვეს.
პოვნის შემდეგ გამოყვანამდე მოზარდებს ჟანგბადის ბალონები, საკვები და მედიკამენტები მიაწოდეს. მღვიმეში დაიღუპა ერთ-ერთი მაშველი, რომელიც საზღვაო ფლოტის ყოფილი წევრი იყო.
