ლონდონის „არსენალისა“ და გერმანიის ნაკრების წევრი მესუთ იოზილი ნაკრებიდან წავიდა. ამის შესახებ 29 წლის ნახევარმცველმა Twitter-ზე დაწერა. იოზილის თქმით, სანაკრებო კარიერის დასრულების მიზეზი რასიზმი და ის შეურაცხყოფა იყო, რაც ბოლო ხანებში გერმანელებმა მიაყენეს.
„ყველაფერი, რასაც 2009 წლიდან მივაღწიე, დავიწყებულია. ძნელია ამის თქმა, მაგრამ მე გერმანიის ფორმით აღარ ვითამაშებ. ეს ჩემი გადაწყვეტილებაა. ვიდრე ჩემ მიმართ რასისტულ განწყობასა და უპატივცემულობას ვგრძნობ, გერმანიის ნაკრებში თამაშს არ ვაპირებ. გერმანიის ნაკრებში სიამაყით ვთამაშობდი, მაგრამ ეს გრძნობა გამიქრა. რასიზმი არასოდეს იქნება ჩემთვის მისაღები“, - წერს იოზილი.
მესუთ იოზილის თქმით, ის განსაკუთრებით გააბრაზა გერმანიის ფეხბურთის ფედერაციის დამოკიდებულებამ. მოთამაშე ჰყვება, რომ ფედერაციის პრეზიდენტ რაინჰარდ გრინდელს ესაუბრა, მაგრამ საერთო ენა ვერ გამონახეს.
„როცა ვიმარჯვებთ, გერმანელების თვალში გერმანელი ვარ და როცა ვაგებთ - ემიგრანტი. ჩემი მეგობრები ლუკაშ პოდოლსკი და მიროსლავ კლოზე არასოდეს მოუხსენიებიათ, როგორც გერმანელ-პოლონელი, მე რატომ ვარ გერმანელ-თურქი? იმიტომ, რომ თურქული ფესვები მაქვს და მუსლიმი ვარ?'' - წერს twitter-ზე ფეხბურთელი.
III / III pic.twitter.com/c8aTzYOhWU
— Mesut Özil (@MesutOzil1088) July 22, 2018
მესუთ იოზილისა და ილქაი გუნდოგანის კრიტიკა გერმანიაში მას შემდეგ დაიწყეს, რაც 2018 წლის მაისში ფეხბურთელმა ლონდონში საქველმოქმედო აქციაზე თურქეთის პრეზიდენტთან ფოტო გადაიღო. რეჯეპ ტაიპ ერდოღანი მაშინ საარჩევნო კამპანიას ატარებდა.
ფეხბურთელმა განაცხადა, რომ ის თავის გადაწყვეტილებას არ ნანობს, რადგან ეს მხოლოდ პატივისცემის გამოხატულება იყო იმ ქვეყნის მიმართ, რომელიც მისი მშობლების სამშობლოა, ერდოღანი კი ამ შემთხვევაში ქვეყნის პრეზიდენტად, უმაღლესი თანამდებობის პირად მიიჩნია და არა პოლიტიკოსად, რომელსაც მხარდაჭერა სჭირდებოდა.