საგარეო საქმეთა მინისტრის, დავით ზალკალიანის თქმით, გერმანიის კანცლერი ანგელა მერკელი საქართველოს მომავალ კვირაში ესტუმრება. გავრცელებული ინფორმაციით, მერკელი თბილისში 23-24 აგვისტოს ჩამოვა.
„მნიშვნელოვანია, რომ იმ ქვეყნის მხრიდან, რომელიც არის საქართველოს ევროპული და ევროატლანტიკური ინტეგრაციის ძალიან მყარი მხარდამჭერი, გვაქვს ასეთი მაღალი დონის ვიზიტი.
ათი წლის წინ იყო წინა ვიზიტი და ვფიქრობ, დროის თვალსაზრისით, ამ ვიზიტს მართლაც ძალიან დიდი მნიშვნელობა აქვს. რეგიონში მიმდინარე პროცესებიდან გამომდინარე, იმ გამოწვევების ფონზე, რომელიც ჩვენს ქვეყანას აქვს, გერმანიის მხარდაჭერა ევროკავშირსა და ჩრდილოატლანტიკურ ორგანიზაციაში არის ძალიან მნიშვნელოვანი“, - განაცხადა ზალკალიანმა.
საგარეო საქმეთა მინისტრის თქმით, გერმანიის კანცლერი საქართველოსთან ერთად, ზოგადად, სამხრეთ კავკასიის რეგიონს ეწვევა.
„ჩვენ გერმანელ პარტნიორებთან ასევე მუდმივად ვსაუბრობთ, რომ საქართველო იყოს გერმანიის დღის წესრიგის მუდმივი თემა. მოგეხსენებათ, მათ აქვთ მუდმივი დიალოგი სხვა საერთაშორისო აქტორებთან, ამიტომ ძალიან მნიშვნელოვანია, რომ სხვა გლობალურ საკითხებთან ერთად საქართველოც იყოს მათ დღის წესრიგში“, - თქვა საგარეო საქმეთა მინისტრმა.