რუსეთი თურქეთის მოქალაქეთა ნაწილისთვის სავიზო რეჟიმს გააუქმებს. ინფორმაციას რუსული მედია თურქეთის საგარეო საქმეთა მინისტრის მევლუთ ჩავუშოღლუს განცხადებაზე დაყრდნობით ავრცელებს.
თურქეთის საგარეო საქმეთა მინისტრის თქმით, სავიზო რეჟიმის შემსუბუქება ბიზნესმენებს და ოფიციალური პასპორტის მქონე პირებს შეეხებათ. ოფიციალური პასპორტები დიპლომატიური სამსახურისა და საჯარო სამსახურის მაღალჩინოსნების საბუთებს გულისხმობს.
სავიზო რეჟიმის გამარტივების სურვილი 12 აგვისტოს რუსეთის საგარეო საქმეთა მინისტრმა გამოთქვა. მევლუთ ჩავუშოღლუს თქმით კი, თურქეთის სურვილია სავიზო რეჟიმის სრული გაუქმება.
რუსეთსა და თურქეთს შორის 30-დღიანი უვიზო რეჟიმი 2010 წლიდან ამოქმედდა, მაგრამ 2015 წელს თურქეთ-სირიის საზღვარზე თურქეთის მიერ რუსული სამხედრო თვითმფრინავის Su-24-ის ჩამოგდების შემდეგ მოსკოვმა ანკარას შეზღუდვები დაუწესა.
2016 წელს მოსკოვის საპასუხოდ რუსეთთან სავიზო რეჟიმი გაამკაცრა თურქეთმაც.
