საქართველოს ნაკრების მოჭიდავე, გენო პეტრიაშვილი სოციალურ ქსელში ჩრდილოეთ ოსეთის დეპუტატის, ჯაბო თედეევის სახიანი მაისურით გადაღებულ ფოტოს გამოეხმაურა. 

„სოციალურ ქსელებში გავრცელებულ ჩემი და ჩემი თანაგუნდელების ფოტოსთან დაკავშირებით მინდა ვთქვა: ფოტო გადაღებულია 2018 წლის ევროპის ჩემპიონატზე დაღესტანში, სადაც ჯაბო თედეევმა გვთხოვა ფოტოს გადაღება თავისივე გამოსახულებიანი მაისურით და ჩვენ მეგობრულად დავთანხმდით, რადგან ჩვენი დიდი გულშემატკივარია და ვმეგობრობთ. მსგავსი მაისურები სუვენირების სახით არის ყველა ჩემპიონატზე. ამ მაისურზე გამოსახულია ჩვენი მეგობარი მოჭიდავე და მხოლოდ ამის გამო გადავიღეთ ეს ფოტო, ეს იყო მხოლოდ მეგობრული ჟესტი.მერწმუნეთ არ მიმიქცევია ყურადღება მაისურის ფერისთვის..
მეც და ჩვენი ნაკრების თითოეულ წევრს ისევე შესტკივა გული ჩვენს სამშობლოზე და დაკარგულ ტერიტორიებზე, როგორც ყველა ქართველს!" - ნათქვამია გენო პეტრიაშვილის განცხადებაში. 

ფოტოზე, რომელიც სოციალურ ქსელში გუშინ გავრცელდა საქართველოს ჭიდაობის ეროვნული ნაკრების მთავარი მწვრთნელი, გიორგი იანტბელიძე და მოჭიდავეები გენო პეტრიაშვილი, ზურაბ იაკობაშვილი და მამუკა ერაძე არიან. მათ რუსეთის დროშისფერიანი მაისურები აცვიათ, რომელზეც ჩრდილოეთ ოსეთის პარლამენტის დეპუტატის ძამბოლატ თედეევის სახეა დაბეჭდილი.

შესწორება: 

„ლიბერალის" მასალის თავდაპირველ ვერსიაში ეწერა, რომ ძამბოლატ თედეევი დე ფაქტო ოსეთის პარლამენტის დეპუტატია. ძამბოლ თედეევი ჩრდილოეთ ოსეთის პარლამენტის დეპუტატია.