რადიკალური ისლამის მიმდევარი „თალიბანის“ მებრძოლებმა ავღანეთის ჩრდილოეთით, ყუნდუზის პროვინციაში მგზავრებით სავსე სამი ავტობუსი დღეს გაიტაცეს.

ყუნდუზის პროვინციის ხელმძღვანელის, მუჰამედ იუსუფ აიუბის თქმით, თალიბები მგზავრებში სავარაუდოდ საჯარო მოხელეებს ეძებდნენ, რომლებიც თავისუფალ დღეებს მშობლიურ რაიონებში ატარებენ.

შემთხვევამდე ერთი დღით ადრე ავღანეთის მთავრობამ თალიბებს ცეცხლის შეწყვეტის შესახებ შეთანხმება შესთავაზა. პრეზიდენტ აშრაფ ღანის განცხადებით, „თალიბანის“ თანხმობის შემთხვევაში, ცეცხლის შეწყვეტის შეთანხმება 20 აგვისტოდან უნდა ამოქმედებულიყო.

„ცეცხლის შეწყვეტის შეთანხმება ორივე მხარემ თანაბრად უნდა შეასრულოს, მისი ხანგრძლივობა კი „თალიბანის“ მოქმედებებზეა დამოკიდებული“, - განაცხადა ღანმა ავღანეთის დამოუკიდებლობის 99 წლისთავისთვის მიძღვნილ ღონისძიებაზე.

მანამდე კი „თალიბანის“ ლიდერებმა განაცხადეს, რომ ქვეყანაში მშვიდობა მანამდე არ დამყარდება, სანამ „უცხო ქვეყნების ოკუპაცია არ დასრულდება“.