სასტუმრო „ველმონდში“ (ყოფილ „ლეოგრანდში“) სამორინის მუშაობა განახლდა. სასტუმროს ადვოკატის კახა წერეთლის თქმით, საგანგებო სიტუაციების მართვის სამსახურის სპეციალისტები მიიჩნევენ, რომ კაზინოში უსაფრთხოების წესები ძირითადად დაცულია და სასტუმროს ნაწილის გახსნის გადაწყვეტილებაც მიიღეს.
„ველმონდს“ შენობიდან სტუმრების გაყვანა და საქმიანობის შეწყვეტა საგანგებო სიტუაციების მართვის სამსახურმა მოსთხოვა და ვადა 17 აგვისტოს 18:00 საათამდე მისცა.
საგანგებოს განცხადებით, მათ 2018 წელს, უსაფრთხოების მიზნით, სამჯერ, დეტალურად შეამოწმეს შენობის სახანძრო-ტექნიკური მდგომარეობა. გაიცა 43 რეკომენდაცია, რომელთა უმეტესობა, მათივე ინფორმაციით, ამ დრომდე არ შესრულებულა.
კახა წერეთელმა საზოგადოებრივ მაუწყებელს განუცხადა, რომ საგანგებო სიტუაციების მართვის სამსახურის დასკვნა 9 ივლისს გაიცა, მას შემდეგ კი სასტუმროში ბევრი რამ გამოსწორდა.
„სასამართლოს გადაწყვეტილება უნდა აღსრულდეს და ჩვენ სრულიად დავემორჩილეთ მას. ამ პერიოდის განმავლობაში ვთანამშრომლობთ საგანგებო სიტუაციათა მართვის სამსახურთან. სპეციალისტებმა ჩათვალეს, რომ კაზინოში ძირითადად დაცულია უსაფრთხოების წესები, ამიტომ ნებართვა მივიღეთ და მიიღეს შენობის ნაწილის გახსნის გადაწყვეტილებაც“, – განაცხადა პირველ არხთან კახა წერეთელმა.
შარშან, ყოფილ სასტუმრო „ლეოგრანდში“ გაჩენილ ხანძარს 11 ადამიანი ემსხვერპლა.