სექსუალური შევიწროების წინააღმდეგ მიმართული კამპანიის, #MeToo-ს ლიდერი, იტალიელი მსახიობი აზია არჯენტო თავის ბრალმდებელს 380 000 დოლარად გაურიგდა - ამის შესახებ სტატიას The New York Times აქვეყნებს.

გამოცემის ინფორმაციით, მისი ბრალმდებელი ახალგაზრდა მსახიობი და მუსიკოსი ჯიმი ბენეტი მაშინ 17 წლის იყო, არჯენტო კი - 37-ს. 

დოკუმენტებით, რომელიც Times-მა მოიპოვა, ირკვევა, რომ ანაზღაურების შესახებ არჯენტოს და ბენეტის ადვოკატები შეთანხმდნენ. ბრალდების თანახმად, სექსუალური შევიწროების ფაქტი 2013 წელს, კალიფორნიის ერთ-ერთ სასტუმროში მოხდა. Time-ის მიერ მოპოვებულ დოკუმენტებს „სელფი" აქვს დართული, რომელშიც არჯენტო და ბენეტი საწოლში არიან გადაღებული.

ოქტომბერში, სანამ ბენეტი გარიგების ფარგლებში თანხის ანაზღაურების მოთხოვნას გაგზავნიდა, The New Yorker-მა სტატია გამოაქვეყნა, სადაც აზია არჯენტო იმ 13 ქალს შორის იყო დასახელებული, რომლებიც ჰარვი ვეინშტეინს სექსუალურ შევიწროებასა და გაუპატიურებაში ადანაშაულებდნენ.