ევროპისა და ევრაზიის საკითხებში აშშ-ის სახელმწიფო მდივნის თანაშემწის, უეს მიტჩელის თქმით, რუსული პროპაგანდა ძლიერია და სოციალურ მედიაში მასთან ბრძოლას დიდი ყურადღება ეთმობა. მიტჩელის აზრით, რუსული გავლენის ირიბად გამტარი გახდა მართლმადიდებელი ეკლესიაც.
„ჩვენ ვიცით რუსეთის ინსტრუმენტები, მაგრამ მზად ვართ, ვებრძოლოთ. საქართველომ დიდი ყურადღება მიაქცია სოციალურ მედიას, თუმცა არის ძალიან დიდი ძალა, მართლმადიდებელი ეკლესია, საიდანაც ირიბად გადმოდის რუსული გავლენა“, - განაცხადა აშშ-ის სახელმწიფო მდივნის თანაშემწემ რუსეთიდან მომავალ საფრთხეებზე საუბრისას, მიმდინარე კონფერენციაზე - „მსოფლიო თავდაყირა 2018”.
მიტჩელის აზრით, საჭიროა საზოგადოების ინფორმირება და ხალხის დარწმუნება, რომ დასავლური ღირებულებები არ ეწინააღმდეგება ქვეყნის ტრადიციებს.
„ჩვენ უნდა გავიდეთ საზოგადოების იმ ფენებზეც, რომლებსაც არ აქვთ მაგალითად ინტერნეტი, თუ გვინდა, ეს კონკურენცია მოვიგოთ“, - განაცხადა მიტჩელმა.