ლევან ყიფიანმა საქართველოს რკინიგზის სამეთვალყურეო საბჭო დატოვა. ამის შესახებ ყიფიანი Facebook-ზე წერს.
„მეგობრებო, შექმნილი ვითარებიდან გამომდინარე, მივიღე გადაწყვეტილება, დავტოვო საქართველოს რკინიგზის სამეთვალყურეო საბჭო. მადლობას გიხდით თანამშრომლობისთვის, გისურვებთ წარმატებებს“, - წერს ყიფიანი.
თბილისის პროკურატურამ „რუსთავი 2-ის“ მიერ გავრცელებულ ჩანაწერზე, რომელშიც, სავარაუდოდ, ყოფილი მინისტრი ლევან ყიფიანი და „ომეგა ჯგუფის“ დამფუძნებელი ზაზა ოქუაშვილი საუბრობენ, გამოძიება დაიწყო. ჩანაწერში საუბარია ორი მილიონი აშშ დოლარის სანაცვლოდ სახელმწიფო ბიუჯეტის წინაშე არსებული დავალიანების რესტრუქტურიზებაზე.
„სისხლის სამართლის საქმე აღძრულია საქართველოს სისხლის სამართლის კოდექსის 180-ე მუხლის მესამე ნაწილის „ბ“ ქვეპუნქტით, რომელიც სხვისი კუთვნილი დიდი ოდენობით ფულადი თანხის მოტყუებით დაუფლებას გულისხმობს“, - ნათქვამია პროკურატურის განცხადებაში.
მოგვიანებით, „რუსთავი 2-მა" კიდევ ერთი აუციოჩანაწერი გამოაქვეყნა, რომელშიც სახელმწიფო დაცვის სპეციალური სამსახურის უფროსის, ანზორ ჩუბინიძის და ფინანსთა ყოფილი მინისტრის, დიმიტრი ქუმსიშვილის გვარები ფიგურირებს.