ვანისა და ბაღდათის მიტროპოლიტი ანტონი (ბულუხია) სალომე ზურაბიშვილის იმ განცხადებას გამოეხმაურა, რომელშიც ის აკრიტიკებს ეკლესიას და მაღალი იერარქიის საეკლესიო პირებს, რადგან ისინი მონაწილეობენ საარჩევნო კამპანიაში და ერევიან სახელმწიფოს მართვის საკითხებში.
მიტროპოლიტმა ანტონმა „რუსთავი 2-თან“ განაცხადა, რომ ის, რაც სულიერი მრევლის დეგრადაციას ეხება, ეკლესიასაც ეხება. მისი თქმით, სალომე ზურაბიშვილს აზროვნებაში უჭირს.
„მღვდელმთავრები რომ გავხდით, ეს იმას კი არ ნიშნავს, რომ მოქალაქეები არა ვართ ამ ქვეყნისა და მერე, ჩვენს სულიერ მრევლს რაც ეხება, ჩვენც ყველაფერი გვეხება. სულიერი მრევლის დეგრადაციას რაც ეხება, ყველაფერი ჩვენც გვეხება. რატომ ფიქრობს, რატომ აქვს ასეთი აზროვნება, მე არ ვიცი. მრევლის კეთილდღეობა, მრევლის საზრუნავი ვის ეხება? ეკლესიას არ ეხება? საიდან მოაქვს ეს დასკვნები, აზროვნებაში ფაქტია რომ უჭირს. არ ვიცი, სალომე ყოველთვის დგამს ისეთ ნაბიჯებს, რომ აამოს მთავრობას“, - განაცხადა მიტროპოლიტმა ანტონმა.
__________________________________________
პრეზიდენტობის კანდიდატმა, სალომე ზურაბიშვილმა ტელეკომპანია „იმედის“ ეთერში განაცხადა, რომ არ შეიძლება, ეკლესია ამ დონეზე მონაწილეობდეს საარჩევნო კამპანიაში და ერეოდეს სახელმწიფოს მართვის საკითხებში. მისი თქმით, მას, როგორც პრეზიდენტს, ექნება ძლიერი პროტესტი კონკორდატის დარღვევაზე.
„როგორ შეიძლება, ეკლესია ამ დონეზე იღებდეს მონაწილეობას საარჩევნო კამპანიაში? სხვათა შორის, როგორც პრეზიდენტი, როგორც პასუხისმგებელი ასევე, ეკლესიასა და ხელისუფლებას, სახელმწიფოს შორის კონკორდატის შესრულებაზე, მე ამაზე მექნება ძლიერი პროტესტი იმიტომ, რომ ეს არის დარღვევა ყველა იმ შეთანხმების, რაც არსებობს მართლმადიდებელ ეკლესიასა და სახელმწიფოს შორის, რომ ჩაერიოს ამ დონით და პირდაპირ ბრალდებებით. ეკლესიის ამ დონის ფიგურები ერევიან იმაში, რაც ნამდვილად არ არის მათი საქმე და არ უნდა ერეოდნენ არც მხარდაჭერით და არც ლანძღვა-გინებით, რაც არ ეკადრება არც ჩვეულებრივ ადამიანს და არც მით უმეტეს მეუფეებს“, - განაცხადა სალომე ზურაბიშვილმა.