ტელეკომპანია „რუსთავი 2“ „ომეგა ჯგუფის“ საქმეზე ახალ ჩანაწერებს აქვეყნებს. 

ჩანაწერის ავთენტურობა ჯერჯერობით დადასტურებული არ არის. 

„რუსთავი 2-ის“ მიერ გვარცელებულ პირველ ჩანაწერში, სავარაუდოდ, „თბილისის თამბაქოს” დირექტორი, ლექსო ანდრიაძე „ომეგას” მენეჯმენტის ერთ-ერთ წარმომადგენელს ესაუბრება, ხოლო მეორე ჩანაწერში სავარაუდოდ „თბილისის თამბაქოს” აქციონერი ირაკლი ჩუბინიშვილი – „ომეგას” დამფუძნებელს ზაზა ოქრუაშვილს.

„რუსთავი 2-ის“ ინფორმაციით, ფარული ჩანაწერიდან ირკვევა, რომ „ომეგა ჯგუფს“ გაყიდული სიგარეტის თითოეული კოლოფიდან „ქართული ოცნების“ ფონდში 2.5 თეთრის ჩარიცხვას სთხოვდნენ. 

„რუსთავი 2-ის“ ინფორმაციით, „ამავე ჩანაწერიდან ირკვევა, რომ „ოცნებისთვის“ ფულის გადახდა სავალდებულო იყო არა მხოლოდ თამბაქოს ქართველი მწარმოებლებისთვის, არამედ ფული ივანიშვილის პარტიაში თამბაქოს უცხოელ მწარმოებლებსაც მიჰქონდათ. მათ, ვინც საკუთარ პროდუქციას ქართულ ბაზარზე ჰყიდის“.

მათივე ცნობით, თანხა განკუთვნილი იყო კონკრეტულად 2017 წლის ადგილობრივი არჩევნებისთვის.