ზაზა სარალიძის თქმით, მოსამართლე ნანა დარასელიამ მოპასუხე მხარის - შსს-ს შუამდგომლობა დააკმაყოფილა და პროცესის საბოლოო განხილვა 31 ოქტომბრისთვის გადადო. ამის გამო, სარალიძე და მისი მხარდამჭერები თვის ბოლომდე ვერ მიიღებენ პასუხს, იყო თუ არა პოლიციის მხრიდან კარვების წართმევა მშვიდობიან პროტესტში ჩარევა და ვერ მიიღებენ სასამართლოსგან კარვების გაშლის ნებართვას.
„თუ ჩვენ 31 ოქტომბრამდე კარვები, ლეიბები, პლედები არ გვექნება, გავიყინებით. ესე იგი, სასამართლო პირდაპირ მოგვიწოდებს, რომ ჩავიდინოთ უკანონობა. ჩვენ ვცდილობთ მაქსიმალურად მოვექცეთ კანონის ჩარჩოში, მაგრამ სასამართლო მხოლოდ შსს-ს მოთხოვნებს ითვალისწინებს“, - თქვა ზაზა სარალიძემ, რომელმაც სასამართლოს სხდომა პროტესტის ნიშნად დატოვა.
სარალიძის თქმით, ეს არის იმის დასტური, რომ ხელისუფლება სასამართლოზეც ახდენს ზეწოლას.
ზაზა სარალიძისა და მალხაზ მაჩალიკაშვილის ინტერესებს სასამართლოში საქართველოს ახალგაზრდა იურისტთა ასოციაციისა და ადამიანის უფლებების სწავლებისა და მონიტორინგის იურისტები იცავენ.
მოსარჩელეთა მოთხოვნაა, რომ სასამართლომ უკანონოდ ცნოს 26 სექტემბერს შსს-სა და შს სამინისტროს საპატრულო პოლიციის დეპარტამენტის თანამშრომლების მიერ კარვების გაშლის ხელშეშლა, დაიცვან მოსარჩელეთა მშვიდობიანი შეკრების უფლება, და უზრუნველყონ კარვის განთავსება პარლამენტის შენობის წინ, მათ მიერ შერჩეულ ადგილას.
