„საერთაშორისო გამჭვირვალობა - საქართველოს“ ინფორმაციით, წინასაარჩევნო პერიოდში არასამთავრობო ორგანიზაციები ხელისუფლების მხრიდან უპრეცენდენტო თავდასხმის ობიექტები გახდნენ. ორგანიზაცია პროტესტის ნიშნად უწყებათაშორის კომისიას ტოვებს.
მანამდე უწყებათაშორისი კომისია არასამთავრობო ორგანიზაციამ „ახალგაზრდა იურისტთა ასოციაციამაც“ დატოვა. ასევე, გაერთიანებულ ოპოზიცია „ძალა ერთობაშიაში“ შემავალმა პოლიტიკურმა პარტიებმა.
„პარტია „ქართული ოცნების” მაღალჩინოსნები - პარლამენტის თავმჯდომარე, დეპუტატები, თბილისის მერი, იუსტიციის მინისტრი და სხვები არაკორექტული და უსაფუძვლო ბრალდებების გაჟღერებით ცდილობენ არასამთავრობო ორგანიზაციების დისკრედიტაციას. განსაკუთრებული აგრესიის სამიზნეები სადამკვირვებლო ორგანიზაციები არიან. აქედან გამომდინარე, „საერთაშორისო გამჭვირვალობა - საქართველო” საპრეზიდენტო არჩევნებთან დაკავშირებით ხელისუფლებასთან კონსტრუქციული თანამშრომლობის რესურსს ვეღარ ხედავს და ტოვებს თავისუფალი და სამართლიანი არჩევნებისთვის უწყებათაშორის კომისიას, რომელიც დღემდე რჩებოდა თანამშრომლობის ბოლო ფორმატად.
არასამთავრობოებს „ქართული ოცნების” ლიდერები პოლიტიკურად ანგაჟირებულ და ფაშისტურ ორგანიზაციებად მოიხსენიებენ. განსაკუთრებულად აღმაშფოთებელი ის არის, რომ მაღალჩინოსანთა განცხადებების შემდეგ სოციალურ ქსელებში გაჩნდა დაფინანსებული გვერდები, სადაც კონკრეტული ორგანიზაციების ხელმძღვანელებზე ყალბი ინფორმაციის გავრცელება და მათი დისკრედიტაცია მიმდინარეობს. ამას ემატება ხელისუფლების მიმართ ლოიალურად განწყობილი მედიების მიკერძოებული გაშუქება, რომელთა მიზანიც მოსახლეობის თვალში სამოქალაქო სექტორის რეპუტაციის შელახვაა, "- ამბობენ ორგანიზაციაში.