საკონსტიტუციო სასამართლოში მეტამფეტამინისა და ამფეტამინის პირადი მოხმარებისთვის უვარგისი ოდენობების ფლობისთვის თავისუფლების აღკვეთის გამოყენებას ასაჩივრებენ.

მოსარჩელეს სასჯელის ზომად განესაზღვრა თავისუფლების აღკვეთა 6 წლის ვადით, რადგან მას აღმოაჩნდა 0.000097 გრამი ნარკოტიკული საშუალება - მეტამფეტამინი და 0.00002 გრამი ნარკოტიკული საშუალება - ამფეტამინი, რაც დაკვალიფიცირდა დიდ ოდენობად.

სარჩელში ვკითხულობთ, აღნიშნული საშუალებების ეს ოდენობა (0.000097 გრამი მეტამფეტამინი და 0.00002 გრამი ამფეტამინი) არა თუ გასასაღებლად, პირადი მოხმარებისთვისაც გამოუსადეგარია, შესაბამისად, აღნიშნული მუხლის საფუძველზე პირი არაპროპორციული სასჯელით ისჯება ისეთი რაოდენობის ნივთიერების შეძენა-შენახვისთვის, რაც პირადი მოხმარებისთვისაც კი გამოუსადეგარია.

„შესაბამისად, ბრალდებული წარმოადგენს, ერთი მხრივ, რეალურ მსხვერპლს დასახელებული ნარკოტიკული ნივთიერებების იმ ოდენობის ნაწილში, რომელიც მითითებულია გამამტყუნებელ განაჩენში, ხოლო მეორე მხრივ, პოტენციურ მსხვერპლს ყველა იმ ოდენობებთან მიმართებით, რომელიც ზოგადად გამოუსადეგარია პირადი მოხმარებისათვის“, - ვკითხულობთ სარჩელში.

მოსარჩელის წარმომადგენლები არიან: რაფიელ კაკაბაძე, ანა გოგლიძე, თეკლა მებურიშვილი, სალომე ჩუთლაშვილი, ვიტალი რიჟვაძე;