ახალი საბანკო რეგულაციები, რომლებიც მიმდინარე წლის პირველი ნოემბრიდან უნდა ამოქმედებულიყო, გადავადდა. ინფორმაციას ამის შესახებ რამდენიმე მედია გამოცემა ავრცელებს. ჟურნალისტებს ინფორმაცია ეროვნულ ბანკში დაუდასტურეს.
როგორც ეროვნულ ბანკში აცხადებენ, დაგეგმილი რეგულაციები შერბილდა და ამჟამად, ტექნიკური დეტალების დაზუსტებაზე მიმდინარეობს მუშაობს.
კითხვაზე, თუ როდის დასრულდება პროექტზე მუშაობა და როდის შევა ძალაში ახალი რეგულაციები, სებ-ში ვერ აკონკრეტებენ.
--------------------------
ფიზიკურ პირებზე სესხების გაცემის ახალი რეგულაციები 2018 წლის პირველი ნოემბრიდან უნდა ამოქმედებულიყო. რომლის თანახმადაც:
- იპოთეკაზე წესდება მაქსიმუმ 15-წლიანი ლიმიტი.
- უძრავი ქონებით უზრუნველყოფილი სამომხმარებლო სესხი მაქსიმუმ 10-წლიანი იქნება.
- ავტოსესხი მაქსიმუმ 6-წლიანი.
- ნებისმიერი ტიპის სესხის ხანგრძლივობა 4 წელს არ უნდა აჭარბებდეს.
ეროვნული ბანკის პროექტის მიხედვით, განსაზღვრული იყო ექვსი საშემოსავლო საფეხური და სესხის კოეფიციენტი:
- თვეში 10 000 ლარზე მეტი – ბანკი თავისი შიდა პოლიტიკის მიხედვით ადგენს სესხსა და პირის შემოსავალს შორის ბალანსს.
- თვეში 7 000-10 000 ლარამდე – ყოველთვიური სასესხო ტვირთი შემოსავლის მაქსიმუმ 30 პროცენტი, ანუ 3000 ლარამდე;
- თვეში 5 000-7 000 ლარამდე – ყოველთვიური სასესხო ტვირთი შემოსავლის მაქსიმუმ 25 პროცენტი, ანუ 1 750 ლარამდე;
- თვეში 3 000-5 000 ლარამდე – ყოველთვიური სასესხო ტვირთი შემოსავლის მაქსიმუმ 20 პროცენტი, ანუ 1000 ლარამდე;
- თვეში 1 000-3 000 ლარამდე – ყოველთვიური სასესხო ტვირთი შემოსავლის მაქსიმუმ 20 პროცენტი, ანუ 600 ლარამდე;
- თვეში 1 000 ლარამდე – ყოველთვიური სასესხო ტვირთი შემოსავლის მაქსიმუმ 20 პროცენტი, ანუ 200 ლარამდე.
