ბიზნესმენი ლევან ვასაძე რადიო „კომერსანტთან“ ინტერვიუში იმ მიზეზებზე საუბრობს, თუ რატომ არ მოვიდა პოლიტიკაში. ის ბიძინა ივანიშვილის მმართველობასაც აფასებს და ამბობს, რომ „ ექვსი წლის გადმოსახედიდან ცხადად ჩანს, კოჰაბიტაციის გარდა, უდავოდ ადგილი ჰქონდა ბიძინას მხრიდან ზნეობასა და სამართლიანობაზე არ გამოსარჩლებას და ფეხებზე დაკიდებას“.
ლევან ვასაძე ამბობს, რომ ერი დაითრგუნა, მორალურად განადგურდა, მიწასთან გასწორდა და დაიჯერა, რომ ამ ქვეყანაზე სამართალი არ არსებობს.
„ეს თემა ბევრად უფრო მნიშვნელოვანია, ვიდრე რაღაც უდღეური ბიზნესი, რომლის ხელობაშიც მე, ისევე, როგორც ბევრი ჩვენგანი, შემთხვევით მოვხვდი, რადგან ჩემს ახლობლებსა და ხალხზე უნდა მეზრუნა.
და როდესაც ხედავ, რომ შენს სამშობლოში ასეთი გაუგონარი რამ ხდება, კვდება ხალხში სამართლიანობის რწმენა, რაღა ბიზნესი უნდა გაინტერესებდეს კაცს. ბიზნესს ხომ იმისათვის აკეთებ, რომ რაც შეიძლება მეტ ადამიანს დაეხმარო შენს გარშემო.
მე არაერთხელ ავხსენი, რატომ არ მიმაჩნია ამ უბინძურეს პოლიტიკაში შესვლა ქვეყნისათვის გამოსავალად, მაგრამ ცხადია, რომ ვერც ეს ავუხსენი ხალხის ნაწილს და ვარ ასე დათრგუნული და დაცინული. თუმცა არც ერთი წამით არ ვკარგავ უფლის იმედს და სრულიად დარწმუნებული ვარ, რომ ღმერთი გამოუჩენს ჩვენს სამშობლოს ამ საშინელებიდან გამოსავალს. ვფიქრობ, ეს მოხდება იმ დღესვე, როდესაც ქართველი დედები ერთიანად შეწყვეტენ საკუთარი შვილების მოკვლას თავიანთ საშოში. მერე გაიხსნება ცა და სასწაულებრივად აღდგება საქართველო, მთელი მისი დიდებით. მანამდე, კი როგორმე უნდა გავუძლოთ ამ ჩვენს მორალურ და ფიზიკურ კვდომას," - ამბობს ლევან ვასაძე „კომერსანტთან“ ინტერვიუში.
