ცენტრალური საარჩევნო კომისიის თავმჯდომარემ, თამარ ჟვანიამ, რამდენიმე წუთის წინ კომენტარი გააკეთა ჟურნალისტებთან და აღნიშნა, რომ არჩევნების მეორე ტურთან დაკავშირებით კანონმდებლობაში კონკრეტული ჩანაწერი არ არის, უნდა იყოს თუ არა უქმე დღეს.
„მეორე ტურთან დაკავშირებით ჩანაწერი არის განსხვავებული. პირდაპირ მინდა აღვნიშნო, რომ ეს ჩანაწერი არა მხოლოდ საარჩევნო კოდექსში, არამდე საქართველოს კონსტიტუციის 70-ე მუხლშია, რომელიც ქვეყნის უმაღლესი კანონმდებლობაა. პირდაპირ არის მითითებული, რომ არჩევნების შედეგების ოფიციალური გამოცხადებიდან ორი კვირის თავზე ინიშნება მეორე ტური. ეს არის მხოლოდ მეორე ტურთან დაკავშირებული ჩანაწერი, ასე რომ, უნდა იყოს თუ არა ის კვირა დღეს, ან რომელიმე სამუშაო თუ არასამუშაო დღეს ასეთი ცალსახა მითითება არ არის.
აქვე მინდა აღვნიშნო, რომ ნებისმიერი დღე, რომელ დღესაც დაინიშნება არჩევნები, იქნება უქმე დღე“, - განაცხადა თამარ ჟვანიამ.
