გაერთიანებული ოპოზიციის საპრეზიდენტო კანდიდატმა, გრიგოლ ვაშაძემ ექსპერტებთან სამუშაო შეხვედრის შემდეგ ჟურნალისტებთან იმ ბილბორდების შესახებ ისაუბრა, რომელიც თბილისის ქუჩებში რამდენიმე დღის წინ გამოჩნდა.
ვაშაძის თქმით, გაერთიანებულმა ოპოზიციამ არაერთხელ აღნიშნა, რომ არავითარი რევანში, დაპირისპირება და შურისძიება არ იქნება. მისი თქმით, ეს მათთვის უკიდურესად მიუღებელია.
„თუ გაერთიანებულ ოპოზიციაზეა ლაპარაკი, მაშინ ამ ბილბორდებზე თაკო ჩარკვიანი, არმაზ ახვლედიანი, მურმან დუმბაძე უნდა ყოფილიყვნენ გამოსახული და თუ ირიბად იმას მიანიშნებენ საზოგადოებას, რომ შურისძიება და რევანში იქნება, გამოცხადებული გვაქვს ასჯერ და ვიტყვი ასმეერთჯერ, საქართველოს მოქალაქეებს ჩვენი სჯერა და მათი ბილბორდების არა. არავითარი რევანში, შურისძიება, ქუჩის არეულობა, დაპირისპირება ან მსგავსი საბიჯები გაერთიანებულ ოპოზიციას დაგეგმილი კი არა, უკიდურესად არასასურველად მიაჩნია ჩვენი ქვეყნისთვის“, - განაცხადა ვაშაძემ.