დღეს ფუკუოკოაში კიუშუს ბაშოს ბოლოსწინა დღის ორთაბრძოლები გაიმართა. მე-14 დღეს ქართველმა სუმოისტმა ტოჩინოშინმა (ლევან გორგაძე) გადამწყვეტი გამარჯვება მოიპოვა. დასავლეთის ოძეკი სეკივაკე მიტაკეუმის შეხვდა. ქართველმა იორიკირით მოიგო და წლის ბოლო ბაშოზე 8-6 ბალანსი დააგროვა.
ამ გამარჯვებით ბოლო ორთაბრძოლის წინ ტოჩინოშინმა დადებითი ბალანსი (კაჩი-კოში) გაინაღდა და იანვარში ოძეკის ტიტული დასაცავი არ გაუხდება. ხვალ ბაშოს ბოლო დღეა და მისი მეტოქე 34 წლის მაეგაშირა შოჰოზანი იქნება, რომელსაც 9-5 ბალანსი აქვს.
ურთიერთშეხვედრებში შოჰოზანთან ტოჩინოშინს უპირატესობა აქვს - 14:5 და თუ ხვალაც გაიმარჯვებს წელს უკვე 60 გამარჯვებას დააგროვებს. 59 გამარჯვებით ტოჩინოშინი საუკეთესოა, მასზე მეტი მოგება წელს არც ერთ სუმოისტს არ დაუგროვებია.
ტოჩინოშინისთვის ეს ბაშო მთლიანობაში არც ისე წარმატებულია, ოძეკი კარგ ფორმაში არ არის. როგორც სპორტული მიმომხილველები ამბობენ, ამის მიზეზი მარჯვენა ფეხის ტრავმაა, რომელიც ქართველმა სუმოისტმა წელს ერთ-ერთ ბაშოზე მიიღო და ბოლომდე ვერ მოირჩინა.
ფოტო: popsport.com