„თუ საერთაშორისო პრაქტიკას გავითვალისწინებთ, ორი ფონდი არ არსებობს. არის ერთი ფონდი და ჩვენთანაც ასე უნდა იყოს“,- განუცხადა ჟურნალისტებს ფინანსთა მინისტრის მოდგილემ, გიორგი კაკაურიძემ.
მისი განმარტებით, პრეზიდენტის სარეზერვო ფონდის გაუქმების გადაწყვეტილება საბოლოო არ არის და პრეზიდენტის ადმინისტრაციის დაფინანსებაზე არჩეულ პრეზიდენტთან 2019 წლის ბიუჯეტის პროექტის დამტკიცებამდე კონსულტაციები გაიმართება. კაკაურიძე ამბობს, რომ ფინანსურ დოკუმენტს პრეზიდენტთან შეთანხმებული სახით მიიღებენ.
„პარლამენტში ბიუჯეტის პროექტის განხილვის პროცესში გამოითქვა მოსაზრება პრეზიდენტის სარეზერვო ფონდისა და ადმინისტრაციის დაფინანსების საკითხის გადახედვასთან დაკავშირებით. თუ საერთაშორისო პრაქტიკას გავითვალისწინებთ, ორი ფონდი არ არსებობს. არის ერთი ფონდი და ჩვენთანაც ასე უნდა იყოს. ფონდის განკარგვის კუთხით შეიძლება პრეზიდენტს გარკვეული უფლებამოსილებები ჰქონდეს. ბიუჯეტის დამტკიცებამდე, გაიმართება პოლიტიკური კონსულტაციები და საბოლოო ვარიანტი პრეზიდენტსა და მის ადმინისტრაციასთან შეთანხმდება“,- განაცხადა გიორგი კაკაურიძემ.
2019 წლის სახელმწიფო ბიუჯეტის პროექტით, პრეზიდენტის ადმინისტრაციის დაფინანსება 9 800 000 ლარიდან 6 000 000 ლარამდე მცირდება, პრეზიდენტის სარეზერვო ფონდი კი მთლიანად უქმდება.
