საგანგებო სიტუაციების მართვის სამსახურის უფროსად თემურ მღებრიშვილი დაინიშნა. ინფორმაციას უწყება ავრცელებს.
„სამოქალაქო უსაფრთხოების შესახებ“ საქართველოს კანონის 42-ე მუხლის პირველი პუნქტის შესაბამისად, დაინიშნოს თეიმურაზ მღებრიშვილი საგანგებო სიტუაციების მართვის სამსახურის უფროსად“ - ნათქვამია ბრძანებაში, რომელსაც ხელი პრემიერ-მინისტრმა მოაწერა.
თემურ მღებრიშვილი 2016-2018 წლებში სასჯელაღსრულებისა და პრობაციის მინისტრის მოადგილე იყო.
2014-2015 წლებში - საქართველოს შინაგან საქმეთა მინისტრის მოადგილე;
2014 წელს - სახელმწიფო დაცვის სპეციალური სამსახურის უფროსი;
2013-2014 წლებში შინაგან საქმეთა სამინისტროს სპეციალური და საგანგებო ღონისძიებების დეპარტამენტის დირექტორი იყო, 2012-2013 წლებში კი ამავე დეპარტამენტში სამმართველოს უფროსის თანამდებობა ეკავა.
ძალოვან უწყებებში მუშაობა თემურ მღებრიშვილმა 1996 წელს დაიწყო. ის 1971 წლის 14 ივლისს თბილისში დაიბადა. 2004 წელს დაამთავრა საქართველოს სახელმწიფო აგრარული უნივერსიტეტი სამართალმცოდნეობის სპეციალობით.