„რამდენიმე ალტერნატიული გზა იყო შეთავაზებული. ბოდიში და მადლობა პოლიციელებს და ვპირდები მათ, რომ თითოეულ პროვოკაციულ ქმედებას ექნება სამართლებრივი შეფასება და სადაც დანაშაულის შემადგენლობას დავინახავთ, ყველა მიეცემა პასუხისგებაში.
სახალხო დამცველს ასევე მინდა, მოვუწოდო, მიაქციოს ყურადღება, თვითონ აქციის მონაწილეები როგორ იქცევიან და ზოგჯერ პოლიციელის, ჟურნალისტისა და სახელმწიფო მოსამსახურის უფლებებსაც სჭირდება დაცვა. ხანდახან მინდა გავახსენო მას ეს." - ასე უპასუხა გიორგი გახარიამ სახალხო დამცველის დღევანდელ განცხადებაზე ჟურნალისტის შეკითხვას.
დღეს საქართველოს სახალხო დამცველმა შსს-ს მოუწოდა, უზრუნველყოს მომიტინგეთა შესაძლებლობა, გადაადგილდნენ თავისუფლად თელავის მიმართულებით, მანიფესტაციის გამართვის მიზნით.
„აღნიშნული წარმოადგენს მათ კონსტიტუციურ უფლებას, რომელიც არ შეიძლება შეიზღუდოს კანონით გაუთვალისწინებელი მიზნებით“, - აცხადებს ნინო ლომჯარია
საქართველოს სახალხო დამცველის აპარატის განცხადებით, ისინი აკვირდებიან მიმდინარე მოვლენებს და კომპეტენციის ფარგლებში შეისწავლიან შეკრებისა და მანიფესტაციის შეზღუდვის კანონიერების საკითხს. ამავდროულად, საქართველოს სახალხო დამცველი მოუწოდებს აქციის ორგანიზატორებს და მოქალაქეებს, არ დაარღვიონ კანონმდებლობა, რათა შეკრება და მანიფესტაცია კონსტიტუციურ ფარგლებში წარიმართოს.