„ერთიანი ნაციონალური მოძრაობის" წევრ დავით კირკიტაძეს თავდებში 30-მდე დეპუტატი უდგება - ამის შესახებ კირკიტაძის ადვოკატმა გიორგი კონდახიშვილმა „რუსთავი 2-თან" საუბარში განაცხადა.
მისი თქმით, კირკიტაძე ბრალს არ აღიარებს და ხვალ მოსამართლეს შესთავაზებენ, მის მიმართ აღკვეთის ღონისძიება არ გამოიყენონ, ხოლო თუკი ამას მოსამართლე არ დათანხმდება, მაშინ გირაოს გამოყენების შუამდგომლობით მიმართავენ.
რაც შეეხება პროკურატურის მოთხოვნას აღკვეთის ღონისძიებად პატიმრობის გამოყენების შესახებ, ადვოკატი ამბობს, რომ ეს სამართლის მოთხოვნებს არ შეესაბამება, რადგან არ არსებობს მისი მიმალვისა და მოწმეებზე ზემოქმედების რისკები.
კირკიტაძის სასამართლო პროცესი ხვალ 10:30 საათზე გურჯაანში გაიმართება.
