შინაგან საქმეთა სამინისტროს საპატრულო პოლიციის დეპარტამენტი ცნობით,  მოქალაქეთა უსაფრთხო გადაადგილების, ინტენსიური თოვის, ლიპყინულისა და  ზვავსაშიშროების გამო, ზოგიერთ რეგიონში, საავტომობილო გზებზე გარკვეული  შეზღუდვები დაწესდა. 

შსს-ს ცნობით, თბილისი-სენაკი-ლესელიძის გზის 45კმ-დან 65-ე კილომეტრამდე მონაკვეთი (სოფ.  იგოეთთან) ამინდის გაუარესების გამო მოყინულია და ავტომანქანების  გადაადგილებას საპატრულო პოლიციის ეკიპაჟები არეგულირებენ.

იგოეთთან ერთმანეთს 20-ზე მეტი მანქანა დაეჯახა - შსს

„შესაბამისი  სამსახურების მიერ ინტენსიურად მიმდინარეობს გზის საფარზე ტექნიკური 
მარილის დაყრა და გაწმენდითი სამუშაოები. საპატრულო პოლიციის თანამშრომლები  მძღოლებს ადგილზე საგზაო მოძრაობის არსებული მდგომარეობის შესახებ აწვდიან  ინფორმაციას. საპატრულო პოლიციის რეკომენდაციით, აღნიშნულ მონაკვეთებზე  გადაადგილება რეკომენდებულია ზამთრის საბურავებით და დაბალი სიჩქარით“,-ნათქვამია გავრცელებულ განცხადებაში. 

ასევე, ყველა სახის ავტოტრანსპორტის მოძრაობა აკრძალულია გუდაური (ფოსტა) - კობის  მონაკვეთზე და ვაზიანი-გომბორი-თელავის საავტომობილო გზაზე; თბილისის  შემოვლით გზაზე  კი იკრძალება მხოლოდ სატვირთო ავტომანქანების  გადაადგილება.
 
შსს მოუწოდებს მოქალაქეებს დაემორჩილონ საპატრულო პოლიციის თანამშრომლების  მითითებებს და მაქსიმალურად დაიცვან საგზაო მოძრაობის წესები.