დიდ დიღომში აფეთქების საქმეზე  „ყაზტრანსგაზ-თბილისის“ ყოფილ ორ თანამშრომელს, თორნიკე ტატიშვილსა და ვაზელ მამადიანს აღკვეთის ღონისძიებად პატიმრობა შეეფარდათ.

გადაწყვეტილება საქალაქო სასამართლოს მოსამართლე ვახტანგ მრელაშვილმა მიიღო. დაცვის  მხარე მოითხოვდა, ბრალდებულებისათვის აღკვეთის ღონისძიების სახით გირაო შეეფარდებინათ. 

დიდი დიღომში გაზის დაგროვებით გამოწვეულ აფეთქების საქმეზე დაკავებულ ყაზტრანსგაზის თანამშრომლებს, თორნიკე ტატიშვილს და ვაზელ მამადიანს ბრალი გუშინ, 19 იანვარს წარუდგინეს. დაკავებულები ბრალს არ აღიარებენ. პროკურატურა მათ სამსახურებრივ გულგრილობას ედავება. 

ეს არის სისხლის სამართლის კოდექსის 220-ე პრიმა მუხლის მეორე ნაწილი და აღნიშნული ბრალი 3-დან 5 წლამდე თავისუფლების აღკვეთას ითვალისწინებს.

16 იანვარს, დიდ დიღომში, ავთანდილის ქუჩაზე საცხოვრებელ კორპუსში მომხდარი აფეთქების შედეგად 4 ადამიანი დაიღუპა, აქედან ერთი მცირეწლოვანი ბავშვია.