თბილისში, ვარკეთილის დასახლებაში, სავარაუდოდ, ბუნებრივი აირით ინტოქსიკაციის შედეგად გუშინ ორი ადამიანი გარდაიცვალა.
„ვარკეთილაირმა" გუშინ მომხდარ ფაქტთან დაკავშირებით დღეს განცხადება გაავრცელა, სადაც წერს, რომ სიკვდილი, სავარაუდოდ, ინტოქსიკაციამ, ე.წ. CO-ს გაჟონვამ გამოიწვია და ბინაში მოქალაქეს დამონტაჟებული ჰქონდა არასტანდარტული გამათბობელი (ე.წ. რეფლექტორი).
„შპს „ვარკეთილაირი“ ბუნებრივი აირის მომხმარებელთა საყურადღებოდ კიდევ ერთხელ აცხადებს, რომ ე.წ. „რეფლექტორი" ადამიანის ჯანმრთელობისა და სიცოცხლისათვის საფრთხის შემცველი დანადგარია. იგი შთანთქავს ოთახში არსებულ ჟანგბადს და გამოყოფს ჯანმრთელობისთვის საშიშ ნახშიროჟანგს. თუ ამ დროს ოთახი ინტენსიურად არ ნიავდება, რამდენიმე საათში ადამიანი ითენთება, იძინებს და საბოლოოდ ფატალური შედეგიც დგება."
კომპანია მოუწოდებს აბონენტებს, არ დაამონტაჟონ საცხოვრებელ ბინაში კუსტარული დანადგარები და მიმართავს „საქართველოს ენერგეტიკისა და წყალმომარაგების მარეგულირებელ ეროვნულ კომისიას, მიიღოს შესაბამისი დადგენილება, რომლითაც ბუნებრივი აირის მომხმარებლებს აეკრძალებათ არასტანდარტული გაზის დანადგარების ბინაში დამონტაჟება, ხოლო ბუნებრივი აირის გამანაწილებელ კომპანიებს დაევალებათ, რომ არასტანდარტული გაზის დანადგარის აღმოჩენის შემთხვევაში დააჯარიმონ მათი მფლობელები (ბიუჯეტის სასარგებლოდ).
შპს „ვარკეთილაირი“ სამძიმარს უცხადებს გარდაცვლილთა ოჯახის წევრებს და და გულწრფელად წუხს მომხდარის გამო!" - ვკითხულობთ განცხადებაში.