ფრაქცია „საქართველოს პატრიოტების“ თავმჯდომარეს, გიორგი ლომიას მიაჩნია, რომ საქართველოში ეროვნული ინტერესების დამცველის ინსტიტუტი უნდა შეიქმნას.
„მე შემოვდივარ ინიციატივით, შეიქმნას ეროვნული ინტერესების დამცველი, ანუ ომბუდსმენი დაიცავს ეროვნულ ინტერესებს. შეიქმნას ისეთი ინსტიტუტი, რომელიც დაიცავს ჩვენს ისტორიას, ჩვენს ადათ-წესს, კულტურას და არ დაგვავიწყდება, საიდან მოვდივართ და საითკენ მივდივართ. თუ ასეთი ინსტიტუტი შეიქმნება, დამიჯერეთ, ნაკლები პრობლემა გექნებათ თქვენ, როგორც ადამიანის უფლებათა დაცვის კომიტეტის თავმჯდომარეს, იმიტომ, რომ პირდაპირ იმ ომბუდსმენს მიაკითხავენ. პრეტენზიებსაც გამოთქვამს ეს ხალხი ომბუდსმენთან, რატომ არ არის დაცული მათი ეროვნული ინტერესი", - განაცხადა ლომიამ ადამიანის უფლებათა დაცვის კომიტეტზე.
მან კომიტეტის წევრებს მიმართა, თუ მათ ეს იდეა მოსწონთ, კანონპროექტის სახეს მისცემს.
მისი თქმით, საქართველოს სახალხო დამცველის თანამდებობაზე ნინო ლომჯარიას პირველი განცხადება იყო ის, რომ მისთვის პრიორიტეტი იქნება სექსუალური უმცირესობების დაცვა.
„ამ ქვეყანაში უამრავი პრიორიტეტია და თავის პრიორიტეტად სახალხო დამცველმა არ უნდა დააყენოს სექსუალური უმცირესობის დაცვა, რომელიც ყველას ომბუდსმენია. ... ეს არის დანარჩენი საზოგადოების დისკრიმინაცია", - განაცხადა ლომიამ.