შინაგან საქმეთა სამინისტროს ცნობით, ნორვეგიაში ქურდობის ფაქტზე დაკავებულები არიან საქართველოს მოქალაქეები, რომელთა შორისაა გრიგოლ აბრალავა, სსიპ საჯარო აუდიტის ინსტიტუტის ყოფილი თანამშრომელი. 

როგორც „ლიბერალს“ აუდიტის სამსახურში განუცხადეს, გრიგოლ აბრალავა ამ ეტაპზე მათი თანამშრომელი აღარ არის. მათი თქმით, ის სსიპ საჯარო აუდიტის ინსტიტუტში სპეციალისტის პოზიციაზე მუშაობდა.

„უხელფასო შვებულება ჰქონდა. შემდეგ დატოვა სამსახური. ამ ეტაპზე ჩვენი თანამშრომელი აღარ არის.  დაახლოებით იანვრის ბოლოდან აღარ არის ჩვენი თანამშრომელი“, - აცხადებენ აუდიტის სამსახურში.

გრიგოლ აბრალავა „ქართული ოცნების" დეპუტატ ვანო ზარდიაშვილის ცოლის ძმაა. 

როგორც ზარდიაშვილის სამუშაო გამოცდილების გრაფაში ვკითხულობთ, ის 2013 - 2016 წლებში სახელმწიფო სამსახურის გენერალური აუდიტორის პირველი მოადგილის და 2013 წელს სახელმწიფო აუდიტის სამსახურის შიდა აუდიტის დეპარტამენტის უფროსის პოზიციებს იკავებდა.

გრიგოლ აბრალავას მამამ, ანზორ აბრალავამ, რომელიც საქართველოს მე-5 მოწვევის პარლამენტის (1999-2004 წ.წ.) დეპუტატი იყო ბლოკიდან „საქართველოს აღორძინება“, დაკავებული შვილის შესახებ „რუსთავი 2-ს" განუცხადა: „მითხრეს, რომ არის ნორვეგიაში, არადა მე ვიცოდი, რომ იყო პოლონეთში, ან გერმანიაში".