„ჯერ არანაირი დაპირება არ მიგვიღია. ეს არის პირველი შეხვედრა, კონსულტაცია, რომელზეც საკმაოდ ვრცლად ვისაუბრეთ, შევაჯამეთ პოზიციები და დავაფიქსირეთ, რომ არანაირი დაპირისპირება პრეზიდენტსა და მთავრობას შორის ამ საკითხთან დაკავშირებით არ არსებობს", - აცხადებს პრეზიდენტის საპარლამენტო მდივანი დიმიტრი გაბუნია პარლამენტში გამართული შეხვედრის შემდეგ. კონსტიტუციის განახლებული რედაქციით, გაუქმდა ეროვნული უშიშროების საბჭო. კონსტიტუცია ითვალისწინებს ეროვნული თავდაცვის საბჭოს შექმნას, რომლის წევრებს შორის არიან პრეზიდენტი და პრემიერ-მინისტრი, თუმცა იგი საომარი მდგომარეობის დროს ყალიბდება.
რაც შეეხება ეროვნული უსაფრთხოების საბჭოს, იგი პარლამენტში მთავრობის მიერ ინიცირებული კანონპროექტის თანახმად, პრემიერ-მინისტრის სათათბირო ორგანოა.
დიმიტრი გაბუნიას აზრით, პრეზიდენტმა გარკვეული ფორმით უნდა მიიღოს მონაწილეობა უსაფრთხოების საბჭოს მუშაობაში.
„ვაცნობიერებთ, რომ ეს არის პრემიერთან არსებული სათათბირო ორგანო და ვიაზრებთ, რომ გარკვეულ უხერხულობას შექმნის კიდეც ორგანოში პრეზიდენტის, როგორც წევრის მონაწილეობა, თუმცა ჩვენი პოზიცია არის ერთმნიშვნელოვანი იმასთან დაკავშირებით, რომ პრეზიდენტს უნდა ჰქონდეს შესაძლებლობა, გარკვეული ფორმით ჩაერთოს საბჭოს მუშაობაში", - მიიჩნევს გაბუნია.
პარლამენტის თავდაცვის და უშიშროების კომიტეტის თავმჯდომარე ირაკლი სესიაშვილი კომიტეტის სხდომაზე კანონპროექტის პირველი მოსმენის დღეს, 13 თებერვალს აცხადებდა, რომ უსაფრთხოების საბჭო პრემიერთან არსებული სათათბირო ორგანოა და ძირითად შემადგენლობაში პრეზიდენტი ვერ იქნება.
დღეს სესიაშვილი ამბობს: „ჩვენ პრინციპებზე ვთანხმდებით, თუ გვინდა, რომ შინაარსობრივად ფორმა შევარჩიოთ. მთავარი არის, რომ პრეზიდენტი იყოს ინფორმირებული და ეს ამ ეტაპზე არსებული კანონმდებლობის ფარგლებში უზრუნველყოფილია, თუ დამატებით გვინდა ფორმა შევცვალოთ და გავაძლიეროთ, აქაც დარწმუნებული ვარ პრემიერიც, მთავრობაც, პარლამენტიც მზად არიან. კომუნიკაციის პრობლემა მით უმეტეს საერთო ეროვნულ ინტერესებზე არ არსებობს".
