თბილისში, მე-15 საჯარო ბაღში, სასწავლო პროცესი შეწყდა. როგორც „ლიბერალს" საბავშვო ბაგა-ბაღების მართვის სააგენტოში განუცხადეს, დილიდან ბაღში უჩვეულო, მძაფრი სუნი იდგა, რომელიც, მათი თქმით, საკანალიზაციო სისტემიდან ამოდიოდა.
ბაღის ადმინისტრაციამ ბავშვები დარბაზებში გადაიყვანა, სადაც სველი წერტილები არ არის. ამ ეტაპზე ისინი მშობლებს უკავშირდებიან, რომ ბავშვები სახლში წაიყვანონ.
საბავშვო ბაგა-ბაღების მართვის სააგენტოში ამბობენ, რომ გამოძახებულია ყველა შესაბამისი სამსახური. ადგილზე იყო ყაზტრანსგაზიც, თუმცა გაზგაყვანილობის პრობლემის საკითხი გამოირიცხა.
„ყველაფერი შემოწმდა და დადასტურდა, რომ კანალიზაციიდან მოდის ეს სუნი", - ამბობენ სააგენტოში.
