„ქართული ემიგრაციის, დემოგრაფიული და ეკონომიკური ცენტრი“ - საჯარო რეესტრმა „პატრიოტთა ალიანსის“ წევრის, ემზარ კვიციანის იდეით შექმნილი ფონდი, რომელიც ახალგაზრდებს ოჯახის შექმნაში დაეხმარება, ამ სახელწოდებით დაარეგისტრირა. ორგანიზაცია ოფიციალურად 13 თებერვალს გატარდა რეგისტრაციაში.
ორგანიზაციის აღმასრულებელი დირექტორია ნუნუ შალამბერიძე. ასევე, ორგანიზაციას ჰყავს აღმასრულებელი საბჭო, რომლის წევრებიც არიან მალხაზ ლომსაძე და გელა ხარჭამაძე, აღმასრულებელ დირექტორთან ერთად.
„ორგანიზაცია უკვე დაფუძნდა. შეიძლება ითქვას, რომ მე ვიქნები ამ ორგანიზაციის ლობი. ეს იქნება ქართული ემიგრაციის დემოგრაფიული და ეკონომიკური ცენტრი. ჩვენ ემიგრაციაში უამრავი ადამიანი გვყავს, რომელიც არის წარმატებული ბიზნესმენი, რომლებსაც არ უჭირთ და სურთ, ვიღაცებს დაეხმარონ. მათ არ აჰქონდათ ამის საშუალება, რადგან არავის არ შეუქმნია მსგავსი ცენტრი. ამიტომაც მომმართეს მე დასახმარებლად. შეიძლება ითქვას, რომ ეს მათი ინიციატივა იყო. ბიზნესმენი ემიგრანტები აპირებენ ცენტრის დაფინანსებას,“ - თქვა ემზარ კვიციანმა 15 თებერვალს.
მისივე თქმით, ცენტრი ასევე დაეხმარება დაოჯახებულ წყვილებს, რომლებიც საცხოვრებლად წავლენ მთაში. კვიციანმა აღნიშნა, რომ ორგანზაცია დაეხმარება იმ დედებს, რომლებსაც ჰყავთ შშმ შვილები. მისი თქმით, მოლაპარაკებები გაიმართება ბანკებთან, უპროცენტო სესხის გასაცემად მრავალშვილიანი ოჯახებისთვის.