გუშინ გორში ორმა არასრულწლოვანმა თვითმკვლელობა სცადა. ინფორმაცია „ლიბერალს“ შსს-ში დაუდასტურეს.
გორის სამხედრო ჰოსპიტალში შეიყვანეს 16 წლის გოგო, რომელსაც სუიციდის მცდელობის გამო, გული გაჩერებული ჰქონდა. როგორც „ლიბერალს“ ჰოსპიტალში უთხრეს, გოგო 18 თებერვალს, დაახლოებით, 22:00 საათზე მძიმე მდგომარეობაში მიიყვანეს.
„ექიმების ჩარევის შემდეგ მოხდა გულის ამუშავება, თუმცა პაციენტი იმყოფება მძიმე კომატოზურ მდგომარეობაში. ამჟამად რეანიმაციაში მართვად სუნთქვაზეა და მისი მდგომარეობა ძალიან მძიმეა“, - უთხრეს „ლიბერალს“ ჰოსპიტალში.
მეორე პაციენტი სუიციდის მცდელობით ჰოსპიტალში, დაახლოებით, 23:00 საათზე შეიყვანეს. „ბიჭს ჭრილობები დაუმუშავდა და დაახლოებით 01:00 საათისთვის გაეწერა კლინიკიდან“, - უთხრეს ჰოსპიტალში „ლიბერალს“.
გავრცელებული ინფორმაციით, 16 წლის ბიჭი და გოგო შეყვარებულები არიან.