დედის დღესთან დაკავშირებით მთაწმინდის გამგეობის მიერ მრავალშვილიან დედათა ავტორბოლის ორგანიზების შესყიდვისთვის გამოცხადებული ტენდერი შეწყდა.
ტენდერის შეწყვეტის შესახებ გადაწყვეტილება სატენდერო კომისიამ სხდომაზე მიიღო. ოქმში აღნიშნულია, რომ: „ტენდერის დასრულების ეტაპზე მოიმატა სხვადასხვა საკომუნიკაციო საშუალებით, გამგეობაში შემოსულმა შეტყობინებებმა. ღონისძიებაში მონაწილეობის სურვილი გამოთქვეს რაიონის ტერიტორიაზე მცხოვრებმა იმ ქალბატონებმაც, რომლებიც არ არიან მრავალშვილიანები. ვინაიდან ტენდერის ფარგლებში არ ხერხდება მსურველთა უმრავლესობის იმ ხარისხით დაკმაყოფილება, რომელიც მისაღები იქნებოდა შესყიდვის მიზნებიდან გამომდინარე, მომხსენებელს მიზანშეწონილად მიაჩნია შეწყდეს ტენდერი და მომზადდეს კორექტირებული სატენდერო დოკუმენტაცია".
მრავალშვილიანი დედების ავტორბოლისთვის მთაწმინდის გამგეობას ტენდერი 14 თებერვლამდე ჰქონდა გამოცხადებული, სატენდერო თანხით - 14 115 ლარი. მას მხოლოდ ერთი პრეტენდენტი ჰყავდა, „საქართველოს ქალთა ავტოსპორტის ფედერაცია“.