გათვალისწინებულია შეწყალების კომისიის იუსტიციის სამინისტროში გადასვლა, - განაცხადა საქართველოს პრეზიდენტმა, სალომე ზურაბიშვილმა პარლამენტში გამოსვლისას.
მისი თქმით, კომისიაში დამატებით ჩაერთვებიან სხვადასხვა ადმინისტრაციული ორგანოს წარმომადგენლები და იგი განიხილავს იმ განცხადებებს, რომლებიც დააკმაყოფილებს ახალ კრიტერიუმებს.
პრეზიდენტის თქმით, კომისია მოამზადებს შესაბამის რეკომენდაციებს, საბოლოო გადაწყვეტილება კი რჩება პრეზიდენტის პრეროგატივად.
რაც შეეხება კრიტერიუმებს, ზურაბიშვილმა განაცხადა, რომ ისინი ახლა მუშავდება.
მისივე თქმით, შეწყალების აქტების რაოდენობა საგრძნობლად შემცირდება.
ზურაბიშვილი მიიჩნევს, რომ შეწყალების დისკრეციული უფლება ნიშნავს პრეზიდენტის მიერ განსაკუთრებული და გამორჩეული, ინდივიდუალური საქმის შერჩევას, სადაც უპირატესობა ჰუმანურ პრიცნიპებს ენიჭება.
„ამ პრინციპების ზედმიწევნით დაცვა ნიშნავს, ალბათ, იმას, რომ შეწყალების აქტების რაოდენობა საგრძნობლად შემცირდება. ეს ასევე შეამცირებს რისკს საზოგადოებისთვის, რომლებიც ყოველთვის თან ახლავს მასობრივ შეწყალებას", - განაცხადა პრეზიდენტმა.
როგორც მან აღნიშნა, შეწყალების ის პრაქტიკა, რომელიც წინა პრეზიდენტების დროს არსებობდა, ზოგჯერ უფრო ამნისტიას ემსგავსებოდა, „ვიდრე იმ კონცეფციას, რომელიც საფუძვლად უდევს პრეზიდენტის დისკრეციულ უფლებას და რომელიც უმეტეს ქვეყნების პრაქტიკაში მოიპოვება.
„პრეზიდენტის დისკრეციული უფლება არც ეს ამნისტიაა, არც პირობით ვადამდე ადრე გათავისუფლების შემცვლელია, არც სასამართლოს ხარვეზების გამოსწორების მექანიზმი", - ამბობს ზურაბიშვილი.
