შინაგან საქმეთა მინისტრის მოადგილემ, ნათია მეზვრიშვილმა განაცხადა, რომ რუსთაველის ოფისიდან, საიდანაც, სავარაუდოდ, „თიბისი ბანკზე“ კიბერთავდასხმა მოხდა, სამართალდამცველებმა ტექნიკა ამოიღეს.
„რუსთავი 2-ის“ ინფორმაციით, ოფისი „ქართული ოცნების“ პიარსამსახურის უფროსს, კოკა ყანდიაშვილს ჰქონდა ნაქირავები. ნათია მეზვრიშვილის თქმით, კოკა ყანდიაშვილი არ დაუკითხავთ, თუმცა, საჭიროების შემთხვევაში, მას გამოძიება კითხვებს დაუსვამს.
„შინაგან საქმეთა სამინისტრო რამდნიმე თვეა, აწარმოებს გამოძიებას. როგორც თქვენ აღნიშნეთ, ეს გამოძიება მიმდინარეობს - ამას ვადასტურებთ. ეს გახლავთ საკმაოდ კომპლექსური სისხლის სამართლის საქმე, არ გახლავთ რიგითი საქმე, რომლის გამოძიების დასრულება შესაძლებელი იქნება ერთ დღესა და ერთ კვირაში.
დღემდე არაერთი საგამოძიებო მოქმედება შესრულდა - როგორც გამოკითხვა, ასევე ამოღება. ამოღებულია კომპიუტერები, მათ შორის, რუსთაველის 12 ნომრიდან. მიმდინარეობს ინფორმაციის შესწავლა," - განაცხადა ნათია მეზვრიშვილმა.