რუსეთის საგარეო საქმეთა სამინისტროს განცხადებით, თუ აშშ გოლანის მაღლობებს ისრაელს მიაკუთვნებს, ეს საერთაშორისო სამართლის დარღვევა იქნება.

საგარეო საქმეთა სამინისტროს პრესსპიკერის, მარია ზახაროვას განცხადებით, ტრამპის სურვილი, აღიაროს ამ ტერიტორიაზე ისრაელის სუვერენიტეტი, პირდაპირ ეწინააღმდეგება გაეროს უშიშროების საბჭოს გადაწყვეტილებებს, რადგან ტერიტორიის საკითხი გაეროს უშიშროების საბჭოს 1981 წლის რეზოლუციით არის განსაზღვრული.

ამერიკის შეერთებული შტატების პრეზიდენტმა დონალდ ტრამპმა 21 მარტს განაცხადა, რომ 52 წლის შემდეგ დრო მოვიდა, აშშ-მა გოლანის მაღლობებზე ისრაელის სუვერენიტეტი სრულად აღიაროს.

„52 წლის შემდეგ აშშ-თვის მოვიდა დრო, რომ ისრაელის სუვერენიტეტი სრულად აღიაროს გოლანის მაღლობებზე, რომელიც სტრატეგიული და უსაფრთხოების კუთხით გადამწყვეტი მნიშვნელობისაა ისრაელის სახელმწიფოსა და რეგიონული სტაბილურობისთვის“, - წერს აშშ-ის პრეზიდენტი Twitter-ზე.

გოლანის მაღლობები ისრაელისა და სირიის სადავო ტერიტორიაა. ის 1967 წლამდე სირიის ნაწილი იყო, ე.წ. „ექვსდღიანი ომის“ შემდეგ კი ისრაელის იურისდიქციაში მოექცა. 1981 წელს ისრაელის ქნესეთმა გოლანის მაღლობებზე მათი სუვერენიტეტი გამოაცხადა.