საპენსიო სააგენტო საინვესტიციო საბჭოს წევრების მისაღებად საერთაშორისო კონკურსს აცხადებს. განცხადების მიხედვით, საინვესტიციო საბჭოს წევრთა ხელფასი წელიწადში 60 000 დოლარამდე იქნება, წლის განმავლობაში შესასრულებელი სამუშაოს ჯამური რაოდენობა კი წელიწადში - 72 საათი, რაც დაახლოებით 9 სამუშაო დღის ტოლია.
საბჭოს წევრის ვალდებულება ექნება, საქართველოში წელიწადში სულ მცირე ერთხელ ჩამოვიდეს. მას მოგზაურობასთან დაკავშირებულ ხარჯსაც აუნაზღაურებენ.
კანონის მიხედვით, საინვესტიციო საბჭო ხუთი წევრისგან შედგება. საბჭოს წევრობის კანდიდატებს შვიდკაციანი კომისია შეარჩევს და პარლამენტი დაამტკიცებს.
დაგროვებითი პენსიის შესახებ კანონის მიხედვით, საბჭოს წევრთა შერჩევის შემდეგ ისინი სრული შემადგენლობის უმრავლესობით, უფლებამოსილების ვადით ირჩევენ საინვესტიციო საბჭოს თავმჯდომარეს.
კანონის მიხედვით, საინვესტიციო საბჭოს წევრად შეიძლება არჩეულ იქნეს პირი, რომელსაც აქვს ფინანსურ სექტორში ფინანსების, ინვესტიციების, ეკონომიკის, რისკების მართვის ან აქტუალული მიმართულებით მუშაობის არანაკლებ 10 წლის პროფესიული გამოცდილება.
