„ვაჩუქოთ ერთმანეთს ტიტები 17 მოკლული ქალის გარეშე?!“ - 9 აპრილს საზოგადოებრივ მაუწყებელთან მოქალაქეები აქციას გამართავენ.
აქციის მიზეზი ისაა, რომ 1989 წლის 9 აპრილიდან 30 წლისთავზე პირველ არხზე ჯემალ სეფიაშვილი სიმღერის „ვაჩუქოთ ერთმანეთს ტიტები“ ახალი ვერსიის გაშვებას აპირებს, რომელშიც მხოლოდ კაცები მღერიან.
კომპოზიტორის გადაწყვეტილებით, 25 მომღერალს შორის არც ერთი ქალი არ არის. როგორც პირველ არხს სეფიაშვილმა უთხრა, ოჯახისა და ქვეყნის დამცველი კაცია და ქალები ამ სიმღერაში მონაწილეობას ამის გამო არ მიიღებენ.
„ვთვლი, რომ ოჯახის სიძლიერე არის მამაკაცი. ქვეყნის სიძლიერე არის მამაკაცი, ქვეყნის დამცველი არის მამაკაცი და სწორედ ამიტომ, აი ეს 25 მამაკაცი იმღერებს ამ სიმღერას“, - თქვა სეფიაშვილმა.
„მოვუწოდებთ პირველ არხს, არ გაუშვათ 30 წლის თავზე, 9 აპრილს პირველი არხის პირდაპირ ეთერში ამ სიმღერის უნამუსო პრეზენტაცია!
მოვუწოდებთ იმ 25 მომღერალ კაცს, არ მიიღონ ამ სამარცხვინო ჩანაწერში მონაწილეობა!
მოვუწოდებთ ყველა ადამიანს, ვისთვისაც ის 17 ქალი, ქვეყნის დაცვის სიმბოლოა, ნუ მიიღებთ ამ სამარცხვინო აბსურდის თეატრში მონაწილეობას, რადგან ეს არის იმ 17 ქალის და კიდევ უამრავი სხვა ქალის შეურაცხყოფა, რომლებმაც საკუთარი სამშობლოსთვის გაწირეს თავი!“ - აცხადებენ აქციის ორგანიზატორები.
1989 წლის 9 აპრილს პარლამენტის წინ მიმდინარე აქცია რუსმა ჯარისკაცებმა დაარბიეს. აქციის დარბევისას ქიმიური საშუალებები, სასანგრე ბარები, ცეცხლსასროლი იარაღი და ჯავშანტრანსპორტიორები გამოიყენეს, რასაც 21 ადამიანი ემსხვერპლა, ასობით მოიწამლა და დაშავდა. დაღუპულებს შორის 17 ქალი იყო.
1989 წლის 9 აპრილს მორის ფოცხიშვილის ლექსის მიხედვით და ჯემალ სეფიაშვილის კომპოზიტორობით სიმღერა „ვაჩუქოთ ერთმანეთს ტიტები“ მიუძღვნეს.
სიმღერის შემსრულებლებს შორის არაერთი ქალი იყო. მათ შორის, თამარ გვერდწითელი, ნანი ბრეგვაძე, მედეა ძიძიგური, ეკა მამალაძე, ეკა კახიანი, ეკა კვალიაშვილი, ირმა სოხაძე, ეთერ კაკულია, მაია ჯაბუა, თამარ ჭოხონელიძე და სხვები.
