ცეკვის ანსამბლ „გორდას“ ისრაელში არშეშვებაზე საგარეო საქმეთა სამინისტროში აცხადებენ, რომ „მესაზღვრეებისათვის საეჭვო გახდა ის გარემოება, რომ ანსამბლი ისრაელში მიდიოდა საბავშვო ფესტივალში მონაწილეობის მიზნით და ანსამბლის 17 წევრიდან მხოლოდ 5 იყო ბავშვი, დანარჩენები კი 25 წლის ზემოთ პირები“. უწყების ცნობით, ისრაელში წასული ანსამბლის შემადგენლობა საქართველოში 17 აპრილს დაბრუნდება. 

„ისრაელში საქართველოს კონსული ესაუბრა ჯგუფის ხელმძღვანელს. ისრაელის მხარე, იმის გათვალისწინებით, რომ ჯგუფის შემადგელობაში იყვნენ ბავშვები, თანახმა იყო, მიეცათ შესაძლებლობა საქართველოს მოქალაქეებისათვის, შეეძინათ ბილეთები საქართველოში დასაბრუნებელ უახლოეს რეისზე, თუმცა მშობლებმა აღნიშნულ შეთავაზებაზე უარი განაცხადეს. შესაბამისად, კომპანია myway-ს, რომლის მეშვეობითაც ჩამოვიდნენ ისინი ისრაელში, თბილისში უახლოესი რეისი აქვს 17 აპრილს 13:30 საათზე“, - აცხადებს სამინისტრო

უწყების განცხადებით, საქართველოს კონსული საქართველოს მოქალაქეების მოსანახულებლად აეროპორტის წინასწარი განთავსების დაწესებულებაში გაემგზავრა. „ასევე, კონსული უკვე ესაუბრა სადეპორტოს ადმინისტრაციას და სთხოვა, განსაკუთრებით ყურადღებით იყვნენ ბავშვებთან მიმართებით. აღსანიშნავია, რომ 5 ბავშვიდან 3-ს თან ახლავს ორივე მშობელი, მხოლოდ ორი ბავშვია მშობლის გარეშე“.