მწერალი ირაკლი კაკაბაძე 17 აპრილს პროკურატურაში ზურაბ ჟვანიას გარდაცვალების საქმეზე გამოკითხეს. „ლიბერალს“ ინფორმაცია უწყებაში დაუდასტურეს.

თავად ირაკლი კაკაბაძის თქმით, ის ტელეკომპანია „იმედის“ ერთ-ერთ გადაცემაში გაკეთებული კომენტარისთვის დაიბარეს, თუმცა მისი თქმით, ამ თემაზე მას ჩვენება ერთხელ უკვე, 2014 წელს ჰქონდა მიცემული.

გადაცემა „სიცრუის დეტექტორში“ ირაკლი კაკაბაძემ თქვა, რომ ზურაბ ჟვანიას საქმე გამოძიებული არ არის, პოლიტიკოსი „გარკვეული ეკონომიკური  ინტერესების მქონე ჯგუფების“ მსხვერპლი იყო და მუქარა თავადაც ჰქონდა მოსმენილი.

„ერიკ გუდისის მხრიდან იყო მუქარა. [2005 წლის] იანვრის შუა რიცხვებში დამირეკა და ტელეფონში პირდაპირ დაიმუქრა, რომ ის აღარ იქნება თანამდებობაზეო“, - განაცხადა კაკაბაძემ.

ირაკლი კაკაბაძის თქმით, გუდისი აშშ-ში მცხოვრები „გრუს“ წარმომადგენელია, რომელიც იარაღით ვაჭრობს და თემურ ალასანიას მეგობარია.