საქართველოს პრეზიდენტი სალომე ზურაბიშვილმა დღეს გამართულ ბრიფინგზე ჯანდაცვის სამინისტროს მიმართა, რომ სასწრაფოდ დაიწყოს სოციალურად დაუცველი, უკიდურესად ღარიბი ოჯახების აღწერა და ბავშვებისთვის განსაკუთრებული ზომები მიიღოს.
„არ შეიძლება, არ გამოვეხმაურო ახალგაზრდის თვითმკვლელობის ტრაგიკულ ფაქტს და შიმშილობასთან ამ ფაქტის დაკავშირებას. ვერ გავარკვევ, რამდენი ფაქტორი იყრის თავს ასეთი ტრაგედიის წარმოქმნაში, მაგრამ მე, როგორც ამ ქვეყნის პრეზიდენტმა ვიცი, რომ ბავშვის შიმშილისა და თვითმკვლელობის ურთიერთკავშირი არის ქვეყნის ტრაგედია და სახელმწიფოს სირცხვილი. ასეთი ტრაგედიები უნდა აღიკვეთოს“, - აცხადებს ზურაბიშვილი
ზურაბიშვილმა მარტვილში გარდაცვლილი მოზარდის ოჯახს მიუსამძიმრა და აღნიშნა, რომ როგორც ქვეყნის რიგითი მოქალაქე ოჯახის წინაშე ბოდიშს იხდის - „ამავდროულად, უნდა ვთქვა ისიც, რომ სირცხვილად მიმაჩნია ასეთი ტრაგედიის პოლიტიკური ნიშნით გამოყენება“.
