„არა მგონია, პუტინს თვითონ სძულდეს ქართველები, თქვენ გეცოდინებათ, როგორი დაბომბვები იციან რუსებმა, და რომ არ გამოიყენეს ეს, რაღაცნაირად დაგვინდეს კიდევ" - ამბობს საქართველოს პარლამენტის დეპუტატი, „პატრიოტთა ალიანსის“ წევრი, ემზარ კვიციანი გადაცემაში „მძიმე კაცთან".

შეგახსენებთ, რომ ოფიციალური მონაცემებით, 2008 წლის აგვისტოს რუსეთ-საქართველოს ომში დაიღუპა ქართული არმიის 170 ჯარისკაცი, შინაგან საქმეთა სამინისტროს 14 თანამშრომელი და 224 სამოქალაქო პირი. 

ემზარ კვიციანი დეპუტატის მანდატს 2016 წლის არჩევნების შემდეგ ფლობს.  ის სასჯელს იხდიდა უკანონო გასამხედროებული ჯგუფის შექმნისა და 2006 წელს კოდორის ხეობაში ამბოხის მოწყობისათვის, თუმცა 2015 წლის 28 იანვარს, პროკურატურასთან მიღწეული საპროცესო შეთანხმების შემდეგ, ქუთაისის სააპელაციო სასამართლომ კვიციანი პატიმრობიდან გაათავისუფლა.