საქართველოს პრეზიდენტის ადმინისტრაციის ხელმძღვანელის ლაშა ჟვანიას თქმით, დავით-გარეჯთან დაკავშირებით შექმნილი ვითარება აჩვენებს, რომ მნიშვნელოვანია საქართველოსა და აზერბაიჯანს შორის საზღვრის დელიმიტაცია დასრულდეს.
„როგორც მოგეხსენებათ, პრეზიდენტი იმყოფებოდა დავით გარეჯში ძეგლთა დაცვის სააგენტოსა და „ევროპა ნონსტრას“ წარმომადგენლებთან ერთად. მათ სრულად დაათვალიერეს ჩვენი სამონასტრო კომპლექსი.
ძალიან სამწუხაროა, როდესაც ასეთი ფაქტები ხდება. განსაკუთრებით ცუდია, როდესაც ეს ემთხვევა აღდგომის დღესასწაულს. ეს ფაქტები ცხადყოფს, რომ ჩვენს ქვეყნებს შორის საზღვრის დელიმიტაციის საკითხი არის ძალიან მნიშვნელოვანი.
შესაბამისად, აუცილებელია, საქართველოსა და ჩვენი მეგობარი აზერბაიჯანის პრეზიდენტების შეთანხმებისამებრ კომისიამ განაახლოს დროებით მუშაობა, რათა ორ მეგობარ ქვეყანას შორის საზღვრები საბოლოოდ დადგინდეს და ასეთი ხელოვნური დაძაბულობა მომავალში აღარ იყოს“, - თქვა ლაშა ჟვანიამ.
ინფორმაცია, რომ რამდენიმე დღის განმავლობაში აზერბაიჯანელებმა უდაბნოს მონასტერთან მისასვლელი გადაკეტეს და სასულიერო პირებს მონასტერში აღარ უშვებდნენ, დავით გარეჯის მამათა მონასტრის არქიმანდრიტმა კირიონმა (ონიანი) გაავრცელა.
საგარეო საქმეთა სამინისტრომ დღეს დაადასტურა, რომ დავით-გარეჯის მონასტრის მიმდებარე ტერიტორიაზე აზერბაიჯანელმა მესაზღვრეებმა უდაბნოს მონასტრის ნახვის მსურველები, ქედს მიღმა არ გაატარეს.
დღესვე, მოგვიანებით საქართველოს საგარეო საქმეთა მინისტრმა, დავით ზალკალიანმა განაცხადა, თქმით, დავით-გარეჯის მონასტერთან დაკავშირებული საკითხი მოგვარებულია. აზერბაიჯანის ხელისუფლება დაკეტილ პუნქტებს გახსნის და მონასტრის ტერიტორიაზე დამთვალიერებელი თავისუფლად შეძლებს გადაადგილებას.