ქართველმა სუმოისტმა ლევან გორგაძემ, იგივე ტოჩინოშინმა 14 შეხვედრაში მეათე ორთაბრძოლა მოიგო და ოძეკის ტიტული დაიბრუნა. მან ყველაზე მაღალი წოდების იოკოძუნა კაკურიუ დაამარცხა.
სუმოს გულშემატკივართა დიდი ნაწილი მიიჩნევს, რომ ოძეკის ტიტული გორგაძეს გუშინ უნდა მოეპოვებინა, მან იაპონელი რიკიში ასანოიამა დაძაბულ შეხვედრაში დაამარცხა, თუმცა მსაჯები დიდი ხნის განმავლობაში მსჯელობდნენ გამარჯვებულის გამოვლენისას და საბოლოოდ ქართველს დამარცხება ჩაუთვალეს.
შეგახსენებთ, რომ ლევან გორგაძემ ოძეკის ტიტული მარტში დაკარგა, როდესაც ჰარუ ბაშოს დასკვნითი მეთხუთმეტე შეჯიბრზე უარყოფითი ბალანსი დააფიქსირა და სეკივაკედ ჩამოქვეითდა.