„რუსთავი 2-ის" 9%-იანი წილის მფლობელის მოთხოვნით, ხვალ პარტნიორთა კრება გაიმართება. ნინო ნიჟარაძის ადვოკატის, გიორგი ყავლაშვილის თქმით, თუ არბიტრაჟზე შეთანხმდებიან, მაშინ სასამართლოდან სარჩელს უკან გაიწვევენ. 

„შევთავაზეთ არბიტრაჟის მეშვეობით საკითხის გადაჭრა. არბიტრაჟში დავის გადატანა. ეს გაჟღერდა „რუსთავი 2-ის“ დირექტორის მხრიდან, ჩვენ ვეხმაურებით ამ განცხადებას და მზად ვართ, მივაღწიოთ ამ საკითხთან მიმართებაში შეთანხმებას და ასევე, ვთავაზობთ კიდევ უფრო მარტივ გზას და ეს მარტივი გზა გახლავთ ფინანსური და იურიდიული დოკუმენტების გადაცემა მსოფლიოში წამყვანი 4 აუდიტორული კომპანიისთვის, სხვადასხვა შესაბამისი საკითხებით და წინასწარ ვაცხადებთ, რომ მხარეთა შეთანხმებით, თუკი იქნება არჩეული ასეთი აუდიტორული კომპანია, ჩვენ ყველანაირად ვენდობით იმ შედეგებს, რომელსაც ეს აუდიტორული კომპანია დადებს,“ - განაცხადა გიორგი ყავლაშვილმა.

„რუსთავი 2-ის“ ერთ-ერთი მეწილე, ნინო ნიჟარაძე, რომელიც კომპანიის 9%-ს ფლობს, გადაუხდელი გადასახადების გამო, კომპენსაციას მოითხოვს. ნინო ნიჟარაძე ჯამში, დაახლოებით 26 მილიონ ლარს ითხოვს სოლიდარულად კომპანიის სხვა მეწილეებისგან.