წუხელ გორთან, ავტობანზე პოლიციის მანქანა ამოტრიალდა. Qartli.ge-ის ინფორმაციით, ჟურნალისტი საბა წიწიკაშვილი შემთხვევის ადგილთან ფოტო და ვიდეო მასალის გადასაღებად მივიდა, რა დროსაც  ფიზიკური შეურაცხყოფა მიაყენეს. 

,,როგორც კი გადმოვედი მანქანიდან, ჩემკენ წამოვიდნენ. ვცადე იმ ადგილამდე მისვლა, საიდანაც ხილვადობა კარგი იყო. ბორდიურსა და მანქანებს შორის მივდიოდი. თავს 10-მდე პოლიციელი დამესხა. ერთმა ტელეფონის წართმევა სცადა, მეორემ ხელი მკრა და ბეჭებში ჩამარტყა. დანარჩენებმა ძალის გამოყენებით დამატოვებინეს ტერიტორია. ამის შემდეგ წამოვედი, ავტობანის მეორე მხარეს  გადავედი გვირაბთან, შემოვუარე და მეორე ხიდიდან დავიწყე გადაღება. მეორე ხიდზე ვეღარ მომიახლოვდებოდნენ. ხიდიდან ხიდზე ვერ გადმოხტებოდნენ", - აცხადებს ჟურნალისტი საბა წიწიკაშვილი.

მისივე თქმით, ერთ-ერთმა პოლიციელმა მობილური ტელეფონის წართმევაც სცადა. მას პროფესიული საქმიანობის შესრულების უფლება შიდა ქართლის შს სამმართველოს თანამშრომლებმა არ მისცეს.

ჟურნალისტის გავრცელებულ ვიდეომასალაში ჩანს, რომ პოლიციელები მას მუშაობაში ხელს უშლიან. გამოცემის ინფორმაციით, ვიდეომასალა გენერალურ ინსპექციას წარედგინება.