ირაკლი ოქრუაშვილმა თანამოაზრეებთან ერთად ახალი პოლიტიკური მოძრაობა დააფუძნა. პოლიტიკური მოძრაობის პრეზენტაცია დღეს გაიმართა. დამფუძნებლების თქმით, იქმნება საინიციატივო ჯგუფი, რომელიც დააფუძნებს საერთო ეროვნულ მოძრაობას სახელწოდებით - „გამარჯვებული საქართველო“. მათი თქმით, მოძრაობა 2020 წლის არჩევნებისთვის მოემზადება.
„საქართველო ისევ გზაგასაყარზე დგას, ერთი გზა, რომლესაც ხელისუფლება და მისი თავიკაცი გვთავაზობს, მიემართება ბნელ საკუჭნაოში, რომელშიც ბატონობს უმეცრება, უიმედობა, სიცრუე, სულმოკლეობა, სიძულვილი, დასმენა, სოციალური და პოლიტიკური რასიზმი, სადაც ეროვნული ინტერესი პირადი ინტერესითაა ჩანაცვლებული, სადაც სახელმწიფო იმართება ერთი ადამიანის სურვილით და არა კანონით, სადაც ღირსებას ვერცხლით წონიან, ამიტომ ჩვენ და ჩვენი თანამოაზრეები გთავაზობთ მეორე გზას, სადაც ჩვენს ქვეყანას ექნება განვითარების პერსპექტივა, სადაც საქართველო დაიბრუნებს კავკასიის მედროშის პოზიციას. სადაც ხალხი დაპურდება, სადაც სამართალი იზეიმებს, სადაც აზდაკი დაამარცხებს მურუსიძეს", - განაცხადა მოძრაობის ერთ-ერთმა დამფუძნებელმა გუბაზ სანიკიძემ.