აშშ-ის სახელმწიფო მდივანმა მაიკ პომპეომ მოუწოდა საქართველოს, გააუმჯობესოს სასამართლო სისტემა. ამის შესახებ პომპეომ საქართველოს პრემიერ-მინისტრთან მამუკა ბახტაძესთან გამართული შეხვედრის შემდეგ გამართულ ერთობლივ ბრიფინგზე ისაუბრა.
„დღევანდელი საუბრისას მოვუწოდე საქართველოს, გააუმჯობესოს სასამართლოს სისტემა და უზრუნველყოს, რომ მისი დემოკრატია გულისხმობდეს თავისუფალსა და სამართლიან არჩევნებს.
პრემიერ-მინისტრთან საუბრისას ასევე მქონდა შანსი, განმეხილა საქართველოს პარლამენტის პასუხისმგებლობა და დავრწმუნებულიყავი, რომ სახელმწიფო სააგენტოები მუშაობენ კანონიერად და ასრულებენ იმას, რასაც საკუთარ მოქალაქეებს დაჰპირდნენ“, - განაცხადა მაიკლ პომპეომ.
მთავრობის ადმინისტრაციის ინფორმაციით, საქართველოს პრემიერ-მინისტრი მამუკა ბახტაძე ვაშინგტონში ამერიკის შეერთებული შტატების აღმასრულებელი და საკანონმდებლო ხელისუფლების მაღალი რანგის წარმომადგენლებს შეხვდება. მაიკ პომპეოს შემდეგ დღეს ბახტაძე ეროვნული უსაფრთხოების საკითხებში აშშ-ის პრეზიდენტის მრჩეველს ჯონ ბოლტონსაც შეხვდება.
